शंकाको घेरामा धरानको कोभिड अस्पताल ll अख्तियारको छानविन

अनियमितता गरेको उजुरीका आधारमा अख्तियारको टोली कोभिड अस्पतालमा गएर स्थलगत निरीक्षण गरी छानविन प्रक्रियालाई अगाडि बढाएको छ ।

धरान / बीपी कोइराला स्वास्थ्य विज्ञान प्रतिष्ठान धरानको कोभिड अस्पतालमा संक्रमित बिरामीको उपचार प्रभावकारी नभएको उजुरी परेपछि अख्तियारले छानविन थालेको छ । अख्तियार दुरुपयोग अनुसन्धान आयोगको कार्यालय इटहरीबाट आएको टोलीले सोमबार रातीसम्म कोभिड अस्पतालमा छानविन गरेको हो ।

कोभिड अस्पताल संचालनका लागि संघीय सरकार र प्रदेश सरकारले दिएको करोडौं रकममा प्रतिष्ठानका उपकुलपती डा. ज्ञानेन्द्र गिरी लगायतका पदाधिकारीहरुले कमसल औषधि उपकरण खरिद गरी आर्थिक अनियमितता गरेको उजुरीका आधारमा अख्तियारको टोली कोभिड अस्पतालमा गएर स्थलगत निरीक्षण गरी छानविन प्रक्रियालाई अगाडि बढाएको छ ।

कोभिड अस्पतालमा खरिद गरिएका १० भेण्टिलेटर मध्य ६ वटा बिग्रिएर बिरामीले उपचार नपाएको विषय बाहिर आएपछि अख्तियारको टोलीले कोभिड अस्पतालको स्थलगत निरीक्षण समेत गरेको छ ।

कोभिड अस्पताल संचालन भएपछि बिरामीको उपचारलाई प्राभावकारी नबनाएको र उपचारमा संलग्न चिकित्सक नर्स र कर्मचारीलाई आवश्यक स्वास्थ्य सामाग्री र खानपिनको व्यवस्था समेत नगरेको भन्दै प्रतिष्ठान व्यवस्थापनविरुद्ध चिकित्सकले विरोध जनाएका थिए । प्रतिष्ठानमै उपचाररत सुनसरीका एक जनप्रतिनिधिले कोभिड अस्पतालको सेवा सन्तोषजनक नभएको गुनासो समेत गरेका छन् ।

कोभिड अस्पताल संचालन गर्नु अगाडि आवश्यक भेण्टिलेटर र अन्य औषधि उपकरण खरिद गर्दा आर्थिक अनियमितता भएको र खरिद गरिएका भेण्टिलेटर दुई महिना नपुग्दै बिग्रिएर काम नलाग्ने भएपछि अख्तियारले स्थलगत निरीक्षण गरी छानविन अगाडि बढाइएको अख्तियार इटहरीका प्रमुख प्रकास पौडेलले बताए।

उनले शंकास्पद खरिद प्रक्रियाका सबै विवरण माग गरिएको पनि बताएका छन् । कोभिड अस्पतलामा चहिने औषधि उपकरण खरिद गर्दा चोरबाट अबलम्बन गरी विशेष अदालतमा विचाराधिन भ्रष्टाचार मुद्धा खेपिरहेका धरानका व्यवसायी चेतन अग्रवालसँग प्रतिष्ठानका उपकुलपती डा. ज्ञानेन्द्र गिरीले मिलेमतो गरी कमसल उपकुरण खरिद गरेको खुलासा भएपछि अख्तियार दुरुपयोग अनुसन्धान आयोगको टोलीले स्थलगत छानविन थालेको बताइएको छ ।

कोभिड अस्पतालमा आवश्यक औषधि उपकरण खरिद गर्दा प्रतिष्ठानका रजिष्ट्रार र निर्देशकको सिरफारिसका आधारमा मात्र उपकुलपतीले स्वीकृत गरी डेण्टर गरी खरिद गर्नुपर्ने प्रावधान छ ।

तर, गिरीले प्रक्रिया मिचेर आफूखुसटी औषधि उपकरण खरिद गरेर कोभिड अस्पतालमा कार्यरत चिकित्सकलाई समेत विभिन्न प्रकारका दबाब दिएपछि चिकित्सक समेत असन्तुष्ट बनेका थिए ।

उपकुलपती गिरीकै अवैध क्रियाकलापका कारण कोभिड अस्पताल प्रमुख कृष्णा पोखरेलले राजीनामा दिएकी छिन् । प्रतिष्ठानको खरिद शाखा प्रमुख विष्णु चापागाईलाई औषधि उपकरण खरिदमा असहयोग गरेको भन्दै गिरीले उनलाई कोरेना संक्रमित भएर आइसुलेसनमा बसेकै बेला अन्य शाखामा सरुवा गरेका छन् ।

प्रतिष्ठानमा औषधि खरिद गर्ने अधिकार रजिष्ट्रार र अपताल निर्देशकलाई मात्र हुने भएपनि उपकुलपती डा. गिरीले दुवैजनाको अधिकार खोसेर आफै कोभिड अस्पतालमा चाहिने औषधि उपकरण खरिद गरेका छन् ।

उपकुलपती गिरीले प्रतिष्ठानका रजिष्ट्रार मोहनचन्द्र रेग्मी र निर्देशक गौरीशंकर साहको समेत अधिकार खोसेका छन् । साहले प्रतिष्ठानको नियमावलीले दिएको अधिकार नै उपकुलपती गिरीले खोसेर अबैध काम गरेको बताएका छन् ।

उपकुलपती गिरी भने कोरोनाको महामारीमा समेत कार्यालय नबसी काठमाडौं बस्ने गरेका छन् । गिरी नियमित कार्यालयमा नबसेकै कारण प्रतिष्ठान संचालनमा समेत समस्या परेको छ ।

गिरी नियमित कार्यालयमा नबसेकै कारण चिकित्सक, नर्स र कर्मचारीको बढुवा प्रक्रिया समेत रोकिएको र वृद्धि भएको तलब समेत नपाएको प्रतिष्ठानको मेडिकल एण्ड डेन्टल फ्याकल्टी वेल्फेयर सोसाइटीका अध्यक्ष डा. विष्णु पोखरेलले बताए। कार्यालयमा नियमितनबसेको र आर्थिक अनियमितताका विषयमा पटक–पटक फोन सम्पर्क गर्दा गिरीले फेन उठाएनन् । – अन्नपुर्णपोष्टबाट

Back to top button